شوونیزم توطئه سی

بیلگی هفته لیگی

مزارشریف شهریده گی اسلام دینی نینگ تورتینچی خلیفه سی علی ابن عبدالله آرامگاه سیده قوریلگن تیموریلرنینگ بی مثال اثری نینگ تاریخینی یاشریشگه حرکت بولماقده.
حضرت علی (ک) مقبره سی تیموریلرنینگ افغانستان ده گی اساسی اثرلریدن سنله دی. اوشبو تاریخی میراث افغانستان شمالیده مزارشریف شهرینی قوریلیشی گه سبب بولگن. اوشبو اثر کیینچه لیک افغانستان حاکملری و تیموریلرنینگ نیبره لری تمانیدن قیته قوریلگن.
حضرت علی مقبره سی سونگی مرته 1375-ینچی ییلده جنرال عبدالرشید دوستم نینگ فرهنگ سیورلیک علاقه سی و سعی و حرکتی طفیلی باشدن آیاغگه چه قیته دن قوریلدی.
روضه نی قیته قوریلیشیده یوزلرچه معمارلر، رساملر، میناتورلر، شاعرلر، ایشچیلر و تورلی کسب و کار ایگه لری قولنی قولگه بیریب، تیموریلردن قالگن اوشبو تاریخی اثرنی ینگی آنه دن توغیلگندیک ایشلب چیقدیلر. بنانینگ تشقی و ایچکریسیده گی میناتورلیک کورینیشلرنی برچه سی جنرال دوستم نینگ قیته قوریشلریدن قالگن.
روضه نینگ ایچکری ایشگیده ۱۵ کیلو گرام آلتین یوزیده یازیلگن کلیمه طیبه آسیلگن ایدی. اوشبو اثر جنرال دوستم نینگ فرمایشی بیلن سعودی عربستان ده توزه تیلگن و حاضرگی تصویر شو کون نی اوزیده آلیگن.
مزارشریف ده گی وطنداشلریمیزنینگ دم آلیشلری اوچون روضه نینگ چهارباغیده اونلب فواره و چوکی لر قوریلگن ایدی. یاشلرنی درس و تعلیم آلیشلری اوچون ۱۳۷۴-ینچی ییلی بویوک بیر کتابخانه قوریلگن ایدی.
اوشبو فعالیتلرنی برچه سی روضه نینگ جنوب تمانیده گی ایشیگی قرشیسیده، اوچ بویوک تاش یوزیده اوزبیکچه، فارسچه و انگلیسچه تیللریده یازیلگن ایدی. بوندن ایککی کون آلدین مذکور تاشلرنی توبدن کوتارگنلر.
هرچند مذکور کتیبه لرده حضرت علی مقبره سینی قیته قوریلیش تاریخی یازیلگن ایدی و اونده مزارشریف یشاوچیلرینی قنچه لیک یاردمچی بولگنی هم قید ایتیلگن ایدی. اما ایریم کوزه توچیلرگه کوره، مذکور کتیبه لرده جنرال عبدالرشید دوستم نینگ آتی یازیلگنی باعث، ایسکی رقیبی عطا محمد نور تمانیدن بوزیلگنی ایتیله دی.
طالبلر افغانستان ده گی اینگ غدار و فرهنگ ستیز گروه سنلر ایدی. اولر اوز دوریده مذکور کتیبه لرگه قول اورمسدن، فقط گینه روضه نینگ شمالی دیوالیده یازیلگن استاد محمد عالم لبیب نینگ بیر فرد شعریده گی "دوستم" آتینی اوچیرگن ایدی.
طالبلر یوقالگندن کیین مذکور کمچیلیک بیر نیچه مرته ایتیلدی. اما هیچ کیم اعتبار قره تمه دی. حاضرده هم عین شو سوز کمچیلیگی بیلن تورگن.
اما حاضرگی کونده دموکراسی نظامینی تمثیل قیله یاتکن و مملکت شمالیده حکومت نینگ خادمی دیب آت چیقارگن بلخ والیسی عطا محمد نور، طالبلردن کوره مینگ مرته یمانراق فرهنگ ستیزلیک و تاریخ ستیزلیک گه قول اورگن.
بو ییل نوروز مراسمی افغانستان، ایران و تاجکستان دولتلری تمانیدن اوتکزیلماقده. شو یوزدن اوزینی دولت نینگ یگانه خدمتگاری دیب حسابله یاتکن نور جنابلری، باشقه لرنینگ قیلگن خدمتینی یاشریشگه و حتی که اونی اورته دن ایلتیشگه اورونگندیک کورینه دی.
بلخ والیسی مزارشریف نینگ برچه یوللرینی آتلنتیردی. اما اوشبو شهرنی قوروچیسی امیرعلیشیر نوای نینگ آتینی بیر کیچیک تورت یولده قویدی. اونی هم بلخ ده گی ایچ کویر یاشلرنینگ تینمس اعتراضلری و حرکتلری بیلن. اما حاضر ایسه اونینگ نیبره سی قیلگن ایشلری نینگ اثرینی اورته دن ایلتدی. اوشبو عملگه قرشی جیم اولتیریلسه، کیله جکده بویوک تیموریلر و اولرنینگ وکیللری سلطان حسین بایقرا و امیرعلیشیر نوایی لرنینگ اوشبو بویوک اثرینی هم اورته دن ایلتیشلری عجب ایمس. بیزلر ایسه حاضرگیدیک زمانه نینگ محکوم انسانلری صفتیده قولیمیزنی منه گیمیز تگیده قوییب، فقط گینه تماشا کوررمیز و خلاص.